१९१७ साली काही तरूणांनी हौस म्हणून नॅशनल लायब्ररी, वांद्रे या संस्थेचा प्रारंभ केला वांद्यांत एक प्रकारचे शैक्षणिक व सांस्कृतिक वातावऱण वाढीस लागले. श्रीराम मंदिरातील एका जून्या चाळीच्या खोलीत थोडी पुस्तके जमवून शंकर धनाजी चिरमुले विष्णू धनाजी चिरमुले,वासुदेव गंगाधर ठाकूर व दत्तात्रय श्रीधर तेंडूलकर या तरूणांनी ग्रंथालय चालविण्यास पुढाकार घेतला.

१९१८ साली प्रत्येक सभासदाने दोन रूपयाचे पु्स्तक जमा करावे असे त्यांनी ठरविले. ग्रंथ संख्या जोमाने वाढत जात असताना जागा अपुरी पडत गेली. अशावेळी बझार रोड वरील जैन मंदिराच्या मागील बदाम वाडीत ग्रंथालय नेण्यात आले. त्यावेळी नाममात्र वर्गणीत पुस्तके सभासदांना वाचावयास देऊ लागले . १९२५ साली घोडबंदरवरील जागा लायब्ररीच्या वाढीला चांगलीच पोषक ठरली व अनेक नवे कार्यकर्ते संस्थेत आले. संस्थेच्या कार्याची दखल घेऊन नगर पालिकेने रू. ५० वार्षिक अनुदान दिले.